Чӑваш чӗлхи эрнине халалласа, ҫӗнӗ чӑваш алфавитне тунӑранпа 150 ҫул ҫитнине халалласа ака уйӑхӗн 21-мӗшӗнче чӑваш чӗлхипе литературине вӗрентекен Теренина Альбина Николаевна 7-9-мӗш класс ачисемпе «Чӑваш халӑхне панӑ халал» ятлӑ класс сехечӗ ирттерчӗ. Иван Яковлев хӑй вилес умӗн чӑваш ачисене валли, вӗсем лайӑх ҫын пулса ÿсчӗр тесе, ырӑ сӑмахсем каласа 1921 ҫулта «Чӑваш халӑхне панӑ халал» ҫырса хӑварнӑ. Халала тӗрлӗ чӗлхе ҫине куҫарнӑ. Урокра шкул ачисем кӗнекене тишкерсе вуларӗҫ, чӑвашсен ҫичӗ пилӗ ҫинчен калаҫрӗҫ, плакатсем туса хатӗрлерӗҫ.

       Иван Яковлевич Яковлевӑн тӑван халахшӑн тунӑ ӗҫӗсем чикесӗр пысӑк, утса тухнӑ кун-ҫулӗ пархатарлӑ. Халӑхӑмӑр пекех мӑнаҫлӑ вӑл, чӑн-чӑн Улӑпӑмӑр. Халалӗсем, пехилӗсем вилӗмсӗр. Унӑн пархатарлӑ ӗҫне сума сӑвасси, халала асра тытасси хальхи тата пулас ӑрусен тӗп тивӗҫӗ.